"Allar ríkisstjórnir í ESB töldu almenning eiga að bera ábyrgðina"

Forseti Íslands sat fyrir svörum hjá franska fjölmiðlinum FRANCE 24 á dögunum. Þar ræddi forsetinn meðal annars um bata Íslands eftir efnahagshrunið, aðildarviðræður Íslands við Evrópusambandið og makríldeilurnar.

„Aldrei áður í sögu landsins höfðum við séð mótmæli eða ofbeldi á borð við þarna," segir Ólafur Ragnar þegar hann rifjar upp efnahagshrunið haustið 2008. Forsetinn minnir á að standa hafi þurft vörð um Seðlabankann dag sem nótt og um hreina martröð hafi verið að ræða.

„Sem betur fer tókst okkur að jafna okkur þó það hafi verið erfitt. Fjórum árum síðan erum við fyrirmynd fyrir önnur lönd sem eru að jafna sig," sagði forsetinn. Hann nefnir ýmsar ástæður fyrir því að Ísland hafi náð að rétta jafnvel úr kútnum og raun ber vitni. Þar ber helst að Íslendingar hafi leyft einkabönknum að fara á hausinn, tekið upp gjaldeyrishöft, reynt að vernda félagslega kerfið og leyft krónunni að falla í verði.

Þá segir forsetinn að Íslendingar hafi snemma áttað sig á því að ekki var aðeins um fjárhagslegt hrun að ræða heldur einnig pólitískt. Forsetinn var einnig spurður út í Icesave-málið og ákvörðun hans að láta þjóðina kjósa með eða á móti samningunum.

„Haustið 2008 og í ársbyrjun 2009 héldu ríkisstjórnir allra landanna sem aðild eiga að Evrópusambandinu, ekki aðeins í Hollandi og Bretlandi, því fram að almenningur á Íslandi, þar með talið bændur og sjómenn kennarar og hjúkrunarfærðingur, ættu að bera ábyrgð á falli einkarekins banka sem rekinn var erlendis."

„Þegar ég ákvað að setja ákvörðunina í hendur þjóðarinnar spáðu nánast allir spekingar í fjármálakerfinu því að Ísland yrði einangrað, yrði Kúba norðursins, og engan endi var að finna á heimsendaspám," segir Ólafur Ragnar. Hann segir þjóðaratkvæðagreiðsluna hafa flýtt fyrir batanum.

„Þegar þjóðaratkvæðagreiðslan fór fram og fólki fannst það hafa valda á ný fór efnahagur þjóðarinnar að batna. Nú, fjórum árum síðar, erum við eitt besta dæmið um efnahagslegan bata," segir Ólafur Ragnar.

Viðtalið verður sýnt í sjónvarpi í Frakklandi á morgun. Þó er hægt að hlusta á það í heild sinni með því að smella hér.