„Lifandi matur er lykillinn að góðri heilsu, líðan og útliti“

Helga Gabríela er 21 árs listnemi sem hefur alltaf haft brennandi áhuga á öllu sem tengist heilsu og mat, en nýlega ákvað hún að taka matarræðið alveg í gegn og tileinkaði sér áhugaverðan hráfæðislífstíl. Helga vinnur þessa dagana að vefsíðu sem lítur dagsins ljós á næstunni og mun innihalda uppskriftir, upplýsingar og myndir af því sem hún gerir í eldhúsinu, en hana langar til að miðla þekkningu sinni á hráfæði til sem flestra og veita fólki innblástur til hugsa vel um heilsuna.

Eftir að hafa lesið sér mikið til um heilsu og næringu tileinkaði Helga sér hráfæðislífstíl sem er byggður á bók sem heitir 80/10/10 eftir Dr. Dauglas Graham. Matarræðið byggist mest á ferskum ávöxtum og grænmeti sem er kolvetnishátt, eins og bönunum, döðlum, ananas, rauðrófum og gulrótum.

„Á morgnanna fæ ég mér t.d. múslí með nóg af ávöxtum, kókosmjólk, og hnetum eða risa vatnsmelónu. Mér finnst líka æðislegt að leggja Chia-fræ og möndlur í bleyti yfir nótt og setja það síðan í blandarann að morgni til að útbúa möndlu-chia graut með granateplum, banana, kanil og engifer. Yfir daginn útbý ég safa eða smoothie með t.d. kókosvatni, bláberjum, acai og Chia. Á kvöldin geri ég t.d. speltpizzu, með spínati, grape, fetaosti, chili og mango, zucchini pasta með marinarasósu, cherry-tómötum, rauðrófu, og basilíku eða fæ mér stórt salat", segir Helga, en hún segir að safapressa og blandari séu skyldueign á hvert heimili.

Hvernig gengur að finna hráefni eins og ferska ávexti á Íslandi? „Það er ekki auðvelt en mér hefur tekist að finna verslanir sem selja fersk hráefni. Ég rölti oft í Frú Laugu og þar get ég fengið allt beint frá bónda. Víðir er líka með gott úrval af ávöxtum og grænmeti. Heilsuhúsið og Lifandi markaður eru góðar verslanir til að fá lífrænt ræktað sem er auðvitað best. Svo fór ég í Kost um daginn og gekk út með poka af ferskum suðrænum ávöxtum eins og papaya, ferskum fíkjum, eldrauðum fallegum jarðaberjum og kókoshnetum."

Finnur þú mikinn mun á þér á þessu matarræði? „Mér líður yfir höfuð mun betur. Ég er að sjá jákvæðar breytingar hjá mér á hverjum degi, þessi lífstíll verður alltaf betri og betri. Ég er með mikla orku og á auðvelt með að vakna á morgnanna. Ég finn að húðin mín er orðin fallegri, hún alveg ljómar. Einnig finn ég að hárið er heilbrigðara og lítur betur út. Þetta er auðvelt þegar viðkomandi fer að finna og sjá árangur ég tala nú ekki um þegar fólk hefur áhuga á hollum lífstíl. Það er ótrúlegt hvað líkaminn gerir fyrir þig þegar þú berð virðingu fyrir honum og ferð vel með hann. Mér finnst mjög áhugavert að huga að heildinni, að næra líkama, huga og sál. Ég trúi að fegurð komi að innan frá og lifandi matur sé lykillinn af góðri heilsu, líðan og útliti."

Helga deilir hér með okkur uppskrift af einföldum djús sem er í uppáhaldi.

1/2 vatnsmelóna, fer eftir hvað hún er stór. Vatnsmelóna er full af andoxunarefnum, A og C vítamínum.

1 sítróna. 


Engifer, eftir smekk

„Ég strái oft Chia eða Hemp fræjum yfir djúsinn. Vatnsmelóna er full af andoxunarefnum, A og C vítamínum á meðan sítróna er bakteríudrepandi og styrkir ofnæmiskerfið. Svo er oft talað um að engifer sé algjör undrameðal, en það eykur orku og kemur blóðrásinni á stað. Njótið vel!"

Hér er hægt að fylgjast með Helgu á Instagram.