Komast hvorki lönd né strönd

Tuttugu og tveir íbúar eru einangraðir á bæjunum í Auðsholtshverfinu í Hrunamannahreppi vegna flóðs í Hvítá. Þá hefur rennsli Ölfusár við Selfoss aukist gríðarlega mikið og er nú um 1.400 rúmmetra á sekúndu en meðal rennsli árinnar er um 300 rúmmetrar á sekúndu. Formaður Almannavarnarnefndar Árnessýslu biður fólk að vara varlega í kringum árnar.

Jóhannes Sigmundsson, fyrrverandi kennari og ferðaþjónustubóndi á Syðra - Langholti í Hrunamannahreppi þekkir vel til flóðanna í Hvítá. Hann segir flóðið núna mjög stórt.

„Þetta er mikið flóð. Ég man nú eftir nokkrum álíka flóðum og jafnvel meira," segir Jóhannes.

Sp. blm. En af hverju gerist þetta?

„Þetta er náttúrulega bæði óhemju mikil úrkoma og síðan er náttúrulega snjórinn að bráðna."

Sp. blm. Og það eru allir einangraðir í Auðholtshverfinu?

„Já, það er ekki hægt að sækja mjólk til þeirra og börnin komast ekki í skólann. Þau verða bara að bíða þess að flóðið sjatni."

Miklir vatnavextir eru í Ölfusá við Selfoss enda stöðugur straumur fólks í kringum ánna til að fylgjast með því hvernig þessi vatnsmesta á landsins hagar sér í svona aðstæðum. Almannavarnarnefnd Árnessýslu fylgist vel með ástandinu.

„Það er svona heldur að hækka í Ölfusánni og það skilar sér niður til okkar vatnið af hálendinu. Það er stórkostlegt að sjá þetta núna en þetta er ekki eins mikið og það var í flóðinu árið 2006, þá fór það alveg upp á bakka," segir Ásta Stefánsdóttir, formaður Almannavarnarnefndar Árnessýslu.

Sp. blm. Hvernig eru horfurnar?

„Ég á ekki vona á að eitthvað muni gerast hér í kvöld eða morgun sem komi til með að valda tjóni. Þetta hækkar kannski eitthvað aðeins en ég á ekki von á að það muni flæða upp á götur."

Sp. blm. Hérna er fólk að fylgjast með?

„Já, það eru margir hér enda er áin stórkostleg en það er um að gera fyrir fólk að fara varlega," segir Ásta.