„Finnst það miður að sérstök lög þurfi um kynjakvóta“

„Þetta kallar ekki á neinar breytingar hjá okkur, það er meirihluta kvenna í stjórn félagsins," segir Björgólfur Jóhannsson, forstjóri Icelandair. Fyrirtækið, sem er eitt stærsta félag í Kauphöll Íslands, mun á aðalfundi sínum í mars breyta samþykktum sínum til að jafna hlut kynja í stjórn fyrirtækisins. Breytingarnar eru gerðar í samræmi við breytingar á hlutafélagalögum sem sett voru árið 2010 en breytingarnar sjálfar taka gildi 1. september.

„Við erum einfaldlega að vinna að því að breyta samþykktum í samræmi við lögin," segir Björgólfur. „Þetta er vegna þess að löggjafin klárar ekki útfærslurnar og þetta er tilraun okkar til að tryggja það að kynjakvótinn sé réttur, það er, 40 prósent karla eða kvenna í stjórn fyrirtækisins á hverjum tíma."

Breytt samþykkt Icelandair gerir ráð fyrir að þær tvær konur og tveir karlar sem flest atkvæði fá í stjórnarkjöri teljist réttkjörin. Sá sem næst kemur á eftir þeim fær svo kosningu óháð því af hvaða kyni viðkomandi er. Þá verður varamaður í stjórn fyrirtækisins ávallt af því kyni sem fámennara er í stjórn.

Í dag er sextíu prósent stjórnarinnar konur.

„Ég er á þeirri skoðun að það þurfi ekki að koma á lögum um hlutföll kynjanna í stjórn félaga" segir Björgólfur en hann telur þó eðlilegt að slík lög hafi litið dagsins ljós. „Þá sérstaklega þegar við lítum á þær breytingar sem stjórnvöld horfa til, að hlutfall kvenna sé aukið í stjórnum félaga."

„Almennt séð finnst mér það miður að löggjafin þurfi að setja slík lög. Oftast er það nú þannig að markaðurinn sjálfur leysir slík vandamál sjálfur," segir Björgólfur.