Össur fundaði með utanríkisráðherrum NATO-ríkja

Össur Skarphéðinsson sat í gærkvöldi fund utanríkisráðherra ríkja Atlantshafsbandalagsins ásamt utanríkismálastjóra ESB, með John Kerry, nýjum utanríkisráðherra Bandaríkjanna, sem haldinn var í Róm. Á fundinum voru til umræðu öll helstu málefni sem varða samstarf Bandaríkjanna og Evrópu, jafnt á sviði öryggismála sem viðskipta.

Utanríkisráðherra lagði í ræðum sínum áherslu á mikilvægi þess að nýr utanríkisráðherra Bandaríkjanna beitti sér fyrir lausn á deilu Ísraels við Palestínumenn, og kvað nýjan glugga hafa opnast í því efni. Kosningar væru frá í bæði Bandaríkjunum og Ísrael, og ný staða hefði skapast fyrir Bandaríkin til að beita sér.