Stjórnarskrárfélagið kvartar yfir fundaröð HÍ

Stjórnarskrárfélagið gagnrýnir Háskóla Íslands harðlega fyrir einsleitni við val á framsögumönnum á fundum sem skólinn hefur haldið um fyrirhugaðar breytingar á stjórnarskrá Íslands.

„Flestum hörðustu gagnrýnendum á tillögur stjórnlagaráðs og ferlið í heild sinni hefur verið boðið að flytja mál sitt og sumum oftar en einu sinni," segir í kvörtun Stjórnarskrárfélagsins til Háskóla Íslands.

Dæmi séu um að frummælendur hafi sjálfir engar rannsóknir birt á þessu sviði eða þeim sértæku málefnum sem erindi þeirra fjalli um. Hins vegar virðist margir aðrir fræðimenn hafa verið sniðgengnir þótt svo að kunnátta þeirra og sérsvið gefi ástæðu til að fá álit þeirra með í umræðuna.

Þá segir Stjórnarskrárfélagið að það sé jafnframt einkennilegt að höfundar fyrirliggjandi tillagna um stjórnarskrárbreytingar, fyrrverandi fulltrúar í stjórnlagaráði, skuli ekki fengnir til að skýra tillögurnar fyrir áheyrendum eða a.m.k. einhverjum þeirra boðið til að sitja í pallborði til að svara og leiðrétta misskilning, sem einatt hefur komið upp á þeim fundum sem þegar hafa verið haldnir. Margir þessara fulltrúa eru auk þess sérfræðingar í stjórnarskrármálum eða einstökum þáttum þeirra.

Segir Stjórnarskrárfélagið að ágætt dæmi um þetta sé fundurinn í dag, undir yfirskriftinni "Ísland, fullveldið og alþjóðasamfélagið". Dr. Eiríkur Bergmann Einarsson, prófessor, hafi mikið fjallað um fullveldið í rannsóknum sínum og doktorsritgerð. Það veki furðu að hann sé ekki á meðal þátttakenda á þessum tiltekna fundi og gæfist þá um leið tækifæri til að heyra frá fyrrum stjórnlagaráðsmanni.