Ferðamönnum í Grímsey fjölgað um 112 prósent

Farþegar með Grímseyjarferjunni Sæfara voru 6.355 árið 2012 en 3.088 árið 2007. Þetta kemur fram á heimasíðu Akureyrarbæjar. Farþegafjöldinn hefur því rúmlega tvöfaldast á fimm árum og eru erlendir farþegar í meirihluta sex mánuði ársins.

Árið 2008 var ný Grímseyjarferja tekin í notkun sem tekur 108 farþega. Hún siglir þrisvar í viku á milli eynnar og Dalvíkur allan ársins hring.

Skemmtiferðaskip hafa haft viðkomu í Grímsey og er von á fjórum þangað í sumar. Farþegafjöldi Norlandair, sem flýgur á milli Grímseyjar og Akureyrar, hefur verið svipaður á milli ára. Þó segja forsvarsmenn félagsins að áhugi útlendinga yfir vetrartímann sé greinilega að aukast. Hlutfall erlendra farþega yfir sumartímann hefur verið 55-62% frá árinu 2008.