Allir almennir læknar á kvenlækningasviði Landspítalans segja upp

Tuttugu almennir læknar á Landspítalanum sögðu upp störfum í dag. Þar á meðal allir almennir læknar á kvenlækningasviði spítalans.

Almennir læknar eru óánægðir með launakjör og segja álag hafi aukist verulega mikið á undanförnum árum. Í síðasta mánuði sögðu allir starfandi almennir læknar á bæklunardeild landsspítalans upp störfum en þær uppsagnir taka að óbreyttu gildi á morgun.

Í dag bættust svo tuttugu í hópinn. Átta læknar á kvenlækningasviði og tólf á lyflækningasviði.

Formaður félags almennra lækna segir að laun almennra lækna hafi ekki hækkað eins og laun annarra stétta undanfarin ár.

„Við höfum ekki lausa stofnanasamninga eða lausa kjarasamninga þannig að við höfum ekki getað gert samkomulag við spítalann. Vitaskuld höfum við rætt við okkar yfirmenn og fengið þau boð að ekki sé hægt að hækka laun," segir Ómar Sigurvin Gunnarsson, formaður Félags almennra lækna.

Hann útilokar ekki fleiri uppsagnir á næstu vikum.

Sp. blm. Hvaða áhrif kann þetta að hafa á starfsemi Landspítalans?

„Þetta kann að hafa mjög alvarleg áhrif á starfsemi og mögulega eins og við sáum 2010 þegar almennir læknar genbgu út, það hafði lamandi áhrif á starfsemi spítalans.