World OutGames verða haldnir í Miami

World OutGames leikarnir árið 2017 verða haldnir í Miami í Bandaríkjunum. Katrín Jakobsdóttir, mennta- og menningarmálaráðherra, og Jón Gnarr, borgarstjóri í Reykjavík, eru bæði stödd í Antwerpen í Belgíu þar sem leikarnir fara fram í ár.

Valið stóð á milli Reykjavíkurborgar og Miami. Hefði það fallið í skaut borgarinnar að halda leikana árið 2017 er ljóst að um einn stærsta viðburð í sögu landsins hefði verið að ræða.

Tilkynnt var um valið á fundi sem GLISA (Gay Lesbian International Sports Association)  hélt í Antwerpen í kvöld.

World Outgames er íþrótta-, menningar- og mannréttindahátíð sem haldin er fjórða hvert ár og stendur yfir í tíu daga. Næsta  hátíð  fer fram í Antwerpen í júlí og hafa þeir þá verið haldnir í Evrópu tvisvar í röð.

Jón Gnarr, borgarstjóri óskaði fulltrúum Miami Beach til hamingju. Hann sagði að þrátt fyrir að Reykjavík hefði ekki orðið fyrir valinu þá hefði undirbúningurinn fyrir útnefninguna vakið talsverða athygli á Reykjavíkurborg.

„Það að komast í tveggja borga úrslit hefur vakið gríðarlega jákvæða athygli á Reykjavík sem viðburðastað. Sú vinna sem var lögð í kynninguna mun koma okkur til góða og við sjáum fram á mörg spennandi verkefni því margar dyr hafa opnast fyrir þátttöku borgarinnar í hinum ýmsu viðburðum,“ sagði Jón Gnarr.