Síbrotamaður ákærður fyrir fíkniefnabrot

Maður á þrítugsaldri hefur verið ákærður fyrir fíkniefnabrot, umferðarlagabrot og þjófnað á sælgæti. Brotin áttu sér stað á vikutímabili.

Lögregla hafði afskipti af manninum í júlí síðastliðnum þegar hann hafði lagt bíl sínum í bílastæði við Krummahóla í Breiðholti. Reyndist maðurinn með amfetamín og tetrahýdrókannabínól í blóði sínu auk þess sem hann hafði ekki ökuréttindi.

Tæpri viku síðar var maðurinn farþegi í sömu bifreið þegar lögreglan stöðvaði hana. Fannst 0,21 gramm af maríjúana við leit í bílnum. Daginn eftir var hann gripinn við þjófnað í verslun Hagkaupa. Hafði hann stolið sælgæti að andvirði 867 króna.

Málið var þingfest í Héraðsdómi Reykjavíkur í morgun.

Uppfært 13.2 klukkan 9:15

Maðurinn átti ekki heimangengt í Héraðsdóm í gær. Þingfestun þess var því frestað.