Horfir frekar til fortíðar en framtíðar

Mikil spenna hefur ríkt í búðum fatahönnunarnema en í síðustu viku lagði hópur fyrsta árs nema við Listaháskóla Íslands í pílagrímsferð sína til Parísar. Þar aðstoða þau virta hönnuði fyrir hina frægu tískuviku sem haldin er nú í febrúar. Ferðin sem er fastur liður í náminu snýst um að veita nemendum þjálfun í að sinna hinum ýmsustu verkefnum sem tengjast tískusýningum auk þess að starfa í framandi og breytilegu umhverfi. Nú hefur nemendum verið úthlutað hönnuðum en spenna ríkti meðal nemenda um úthlutanir á eftirsóttum plássum.

Fær að vinna fyrir Soniu Rykiel

Átta nemendur lögðu í víking í ár og mikil samkeppni um að fá sem vinsælasta hönnuðinn. Ein þeirra sem hlotið hefur hvað eftirsóttasta plássið er Elsa Vestmann Kjartansdóttir en hún aðstoðar nú Soniu Rykiel, sem kaupglaðir Íslendingar ættu að þekkja, því hún hannaði meðal annars fyrir tískuvöruverslunina H&M. Elsa er að vonum mjög spennt. "Ég hef aldrei verið svona lengi að heiman, en við búum öll saman í pínulítilli íbúð og höfum það gaman. Ég er ekki í neinum vafa um að það verður eitt allsherjar ævintýri. Við náum öll svo vel saman og erum samrýndur hópur. Þetta er svo sannarlega skemmtilegt þó vinnan sé mikil og lítið um frítíma. Ég á þó von á að álagið rjátli aðeins af okkur þegar tískuvikunni lýkur og við náum smá tíma saman til að anda og lifa smá. Upplifa París."

Fyrirsæturnar ekki í fýlu

Aðspurð segist Elsa ótrúlega sátt við að vinna með Soniu. „Hún var bara einmitt sú sem ég óskaði mér mest að lenda hjá. Við eigum það nefnilega sameiginlegt að vera báðar kvenlegar í hönnun okkar og hafa húmor fyrir hönnuninni sem mér finnst mikilvægt. Mikill léttleiki ræður líka ríkjum í sýningum hennar og fyrirsæturnar brosa og eru glaðar ólíkt svo mörgum öðrum sem virðast alltaf vera í fýlu. Það finnst mér mikilvægt mottó."

Óraunverulegt ævintýri

„Það er samt svo óraunverulegt að þetta sé í alvöru að gerast. Litlir fyrsta árs nemar frá litla Íslandi að taka þátt í þessum stóra viðburði sem tískuvikan er. Mér finnst það alveg ótrúlegt að þetta sé raunverulegt," segir Elsa og bætir því við að þau verði úti í sex vikur en fram að þessu hafi tíminn hljómað svo fjarlægur, þangað til nú. „Sjálf vil ég að vísu alltaf horfa frekar til fortíðar en framtíðar og það skín svolítið í gegnum stílinn minn sem fatahönnuður."

Það á þó varla við í tilfelli tískuvikunnar því nú mega krakkarnir hafa sig alla við, tískuvikan er óðum að hefjast og nóg að gera. „Þetta er bara svo æðislega gaman allt saman. Svo er Sonia líka sjálf svo mikið París, þetta getur ekki nema gengið vel," segir þessi glaðlega stúlka að lokum.