Björt framtíð tekur risastökk samkvæmt Gallup

Verulegar breytingar eru á fylgi flokkanna frá síðasta mánuði samkvæmt þjóðarpúlsi Gallups. Þar kemur fram að tæplega 19% segjast myndu kjósa Bjarta framtíð færu kosningar til Alþingis fram í dag og er þetta aukning um sjö prósentustig milli mánaða. Flokkurinn fengi þannig næstmest fylgi yrðu þetta úrslit kosninga.

Fylgi Samfylkingarinnar minnkar um þrjú prósentustig milli mánaða, en tæplega 16% segjast myndu kjósa Samfylkinguna færu kosningar til Alþingis fram í dag. Þetta er minnsta fylgi sem Samfylkingin hefur mælst með síðan í nóvember 1999.

Fylgi við Framsóknarflokkinn eykst um eitt prósentustig, en rúmlega 14% segjast myndu kjósa flokkinn nú.

Fylgi Vinstrihreyfingarinnar - græns framboðs minnkar um eitt prósentustig milli mánaða og mælist fylgi hans nú nær 8%. Fylgi annarra framboða er nær óbreytt milli mánaða. Tæplega 36% segjast myndu kjósa Sjálfstæðisflokkinn færu kosningar til Alþingis fram í dag, rúmlega 2% segjast myndu kjósa Hægri Græna, liðlega 2% Dögun, sama hlutfall myndi kjósa Pírata og 1% segist myndi kjósa Samstöðu.

Rösklega 12% svarenda taka ekki afstöðu eða neita að gefa hana upp og tæplega 10% segjast myndu skila auðu eða ekki kjósa ef kosið yrði til Alþingis í dag.

Stuðningur við ríkisstjórnina minnkar um tvö prósentustig milli mánaða og mælist stuðningur við stjórnina nú 30%.

Spurt var: Ef kosið yrði til Alþingis í dag, hvaða flokk myndir þú kjósa?

En hvaða flokkur yrði líklegast fyrir valinu?

Hvort er líklegra að þú kysir Sjálfstæðisflokkinn eða einhvern hinna flokkanna?

Styður þú ríkisstjórnina?