Tómas Lemarquis í spennutrylli McG

Íslenski leikarinn Tómas Lemarquis er meðal leikara í kvikmyndinni Three Days to Kill sem er væntanleg á árinu.

Myndin er framleidd af sjálfum Luc Besson, manninum á bak við myndir á borð við Taken, Leon og The Transporter, en það er Terminator-kempan McG sem leikstýrir.

Ekki er vitað hvert umfang hlutverks Tómasar er í myndinni, en á móti honum leika svo sannarlega engir aukvisar. Kevin Costner leikur stórt hlutverk, auk þeirra Amber Heard og Hailee Steinfeld, en hún gerði garðinn frægan árið 2010 þegar hún var tilnefnd til Óskarsverðlauna fyrir hlutverk sitt í myndinni True Grit.

Three Days to Kill er sögð vera hörkuspennandi tryllir, en hún segir frá dauðvona njósnara sem fær aðgang að undralyfi sem getur bjargað lífi hans, en með þeim skilyrðum að hann verði að fara í einn njósnaleiðangur til viðbótar.