Gunnar og Eiríkur Örn fengu bókmenntaverðlaun

Forseti Íslands, Ólafur Ragnar Grímsson, afhenti í dag Íslensku bókmenntaverðlaunin 2012 við hátíðlega athöfn á Bessastöðum. Verðlaunin hlaut í flokki fagurbókmennta Eiríkur Örn Norðdahl fyrir skáldsöguna Illsku, gefna út af Máli og menningu, og í flokki fræðirita og bóka almenns efnis Gunnar F. Guðmundsson sagnfræðingur fyrir bókina Pater Jón Sveinsson - Nonni sem Opna gefur út. Þetta er í tuttugusta og fjórða skiptið sem verðlaunin eru afhent en fyrst var tilnefnt til þeirra árið 1989.

Forseti Íslands setti samkomuna en því næst flutti Kristján B. Jónasson, formaður Félags íslenskra bókaútgefenda, stutta tölu og kynnti tilnefnda höfunda. Forseti Íslands kynnti niðurstöður dómnefndar og afhenti verðlaunin. Verðlaunahöfundar ávörpuðu gesti.

Þriggja manna lokadómnefnd, skipuð þeim Viðari Eggertssyni, leikhússtjóra, Hrefnu Haraldsdóttur bókmenntafræðingi og Dr. Stefaníu Óskarsdóttur, stjórnmálafræðingi, sem var formaður, valdi verkin úr hópi tíu bóka sem tilnefndar voru til verðlaunanna 1. desember síðastliðinn, fimm í flokki fagurbókmennta og fimm í flokki fræðirita og bóka almenns efnis.

Íslensku bókmenntaverðlaunin nema einni milljón króna í hvorum flokki. Auk þess er verðlaunahöfum afhent skrautrituð verðlaunaskjöl og verðlaunagripir, hannaðir af Jóni Snorra Sigurðssyni á gullsmíðaverkstæði Jens – opin bók á granítstöpli með nafni verðlaunahöfundar og bókar hans.

Eftirfarandi bækur voru tilnefndar til verðlauna í flokki fagurbókmennta:

Auður Ava Ólafsdóttir: Undantekningin

Útgefandi: Bjartur

Eiríkur Örn Norðdahl: Illska

Útgefandi: Mál og menning

Gyrðir Elíasson: Suðurglugginn

Útgefandi: Uppheimar

Kristín Ómarsdóttir: Milla

Útgefandi: JPV útgáfa

Sigurjón Magnússon: Endimörk heimsins

Útgefandi: Ormstunga



Eftirfarandi bækur voru tilnefndar til verðlauna í flokki fræðirita og bóka almenns efnis:

Einar Már Jónsson: Örlagaborgin. Brotabrot úr afrekasögu frjálshyggjunnar. Fyrri hluti

Útgefandi: Ormstunga

Gunnar F. Guðmundsson: Pater Jón Sveinsson – Nonni

Útgefandi: Opna

Gunnar Þór Bjarnason: Upp með fánann. Baráttan um uppkastið 1908 og sjálfstæðisbarátta Íslendinga

Útgefandi: Mál og menning

Jón Ólafsson: Appelsínur frá Abkasíu. Vera Hertzsch, Halldór Laxness og hreinsanirnar miklu

Útgefandi: JPV útgáfa

Steinunn Kristjánsdóttir: Sagan af klaustrinu á Skriðu

Útgefandi: Sögufélag