Fimmtíu þúsund tonn af dauðri síld í Kolgrafafirði

Líklegt þykir að um fimmtíu þúsund tonn af síld hafi drepist í Kolgrafafirði frá því um miðjan desember á síðasta ári. Hafrannsóknarstofa hefur nú lokið rannsóknum sínum í firðinum.

Eins og kunnugt er drápust 30 þúsund tonn af síld í Kolgrafafirði fyrir áramót. Það var síðan þann 1. febrúar síðastliðinn sem mikið af nýdauðri síld fannst í firðinum.

Rannsókn Hafró á málinu fólst í því að kanna umhverfisaðstæður, leggja mat á magn þeirrar síldar sem drapst og dreifingu hennar. Þá var ástand sjávarins einnig kannað, það er hiti, selta og súrefni. Auk þess var botn fjarðarins skoðaður með neðansjávarmyndavélum.

„Hafrannsóknastofnun hefur nú greint þau gögn sem safnað var og samkvæmt þeim er metið að um 22 þúsund tonn síldar hafi drepist í Kolgrafafirði þann 1. febrúar síðastliðinn. Það mat er þó háð mikilli óvissu vegna dreifingar síldarinnar. Því má telja líklegt að rúm 50 þúsund tonn af síld hafi drepist í firðinum frá því um miðjan desember," segir í tilkynningu frá Hafrannsóknarstofu.

Rotnun dauðrar síldar í firðinum getur viðhaldið lágum súrefnisstyrk í firðinum og því gæti áframhaldandi hætta verið til staðar á næstu vikum.