Græddi gríðarlega á afleiðuviðskiptum - ákærður fyrir að borga ekki skatt

Fyrrverandi starfsmaður Lífeyrissjóðs Verzlunarmanna hefur verið ákærður af embætti sérstaks saksóknara fyrir meiriháttar skattalagabrot.

Hann er ákærður fyrir að hafa ekki staðið skil á 60 milljónum króna skatti vegna afleiðuviðskipta við Landsbankann og Glitni á árunum 2006 til 2008.

Alls gerði maðurinn 584 gjaldmiðlasamninga og þénaði þannig rétt tæplega 600 milljónir króna. Mest þénaði hann árið 2006 en þá þénaði hann rúmlega 250 milljónir á þessum viðskiptum.

Þess er krafist að maðurinn verði dæmdur til refsingar og að hann greiði allan sakakostnað.

Maðurinn mætti ekki í þingfestingu málsins í morgun. Því er frestað og verður tekið aftur fyrir í mars.