Hnífaárás í miðbænum

Um klukkan hálf fjögur í nótt náðu dyraverðir að yfirbuga mann á skemmtistað við Hafnarstræti eftir að hann hafði veitt öðrum manni áverka, á hendi og víðar, með hníf. Hnífamaðurinn nefbrotnaði í átökunum en upplýsingar um líðan mannsins sem varð fyrir árásinni liggja ekki fyrir að svo stöddu.

Rétt eftir miðnætti var tæplega fimmtugur karlmaður handtekinn á Kalkofnsvegi á móts við Hörpu en sá hafði ekið bifreið sinni á nokkra bíla víðsvegar um miðborgina. Hann reyndist ofurölvi og gistir nú fangageymslur lögreglunnar.

Þá reyndi maður að hrifsta peninga úr sjóðskassa veitingastaðar við Laugaveg um áttaleytið í gærkvöldi. Þegar óprúttni aðilinn reyndi að hlaupa út með þýfið náðu starfsmenn staðarins að yfirbuga hann og var lögregla kölluð til. Maðurinn sem er á þrítugsaldri og á reynslulausn var umsvifalaust færður í járn.

Lögreglumenn á Suðurnesjum komu í gærkvöld auga á kyrrstæða bifreið en í henni reyndust tveir menn sitja við drykkju og var þeim bent á að þeir gætu ekki ekið bifreiðinni eins og ástatt væri um þá. Ekki leið langur tími þar til lögreglumennirnir sáu til bifreiðarinnar í akstri á Selvíkurvegi en þar var annar mannanna sem lögregla hafði rætt við skömmu áður. Í bílnum fundust áteknar og óáteknar áfengisumbúðir. Á lögreglustöð þrætti maðurinn, sem hafði áður verið sviptur ökuréttindum ævilangt, fyrir að hafa ekið og sagðist aðeins hafa drukkið tvo bjóra.