Reynt að blekkja viðskiptavini Símans

Svo virðist sem óprúttnir aðilar úti í heimi séu að reyna blekkja viðskiptavini Símans með tölvupósti sem borist hefur á viðskiptavini síðustu daga. Þar er pósturinn sendur út í nafni fyrirtækisins og stílaður á Bäste kund.

Þar eru viðskiptavinir beðnir um, á mjög lélegri íslensku, að smella á hlekk. Þegar ýtt er á hann er beðið um greiðsluupplýsingar.

Gunnhildur Arna Gunnarsdóttir, upplýsingafulltrúi Símans, segir að fyrirtækið hafi fengið um 10 fyrirspurnir um málið en ekki er vitað til þess að einhver viðskiptavinur hafi látið greiðslukortaupplýsingar af hendi.

Fyrirtækið mun skoða það á næstu dögum hvort að málið verði tilkynnt til lögreglunnar.

Síminn hvetur alla sem fá póstinn að eyða honum og alls ekki afhenda upplýsingar um greiðslukort.