Vilja að lögregla fái heimild til að beita virkum tálbeitum til að góma barnaníðinga

Formaður allsherjarnefndar vill beita sér fyrir því að lögregla fái heimild til þess að beita virkum tálbeitum á netinu. Ríkissaksóknari segir að með því séu menn komnir á varhugaverðar slóðir og að hugmyndina þurfi að íhuga vandlega.

Allsherjar og menntamálanefnd kallaði í morgun til sín fjölda gesta til þess að ræða kynferðisbrot gegn börnum í ljósi umræðu síðustu daga eftir að Kastljós greindi frá máli barnaníðingsins Karls Vignis Þorsteinssonar.

Stefáni Eiríkssyni lögreglustjóra var tíðrætt á fundinum um Netið og þau tækifæri sem barnaníðingum gefast þar til þess að komast í samband við börn og mynda við þau trúnaðarsamband. Að mati Stefáns þarf því nauðsynlega að ræða hvort lögregla fái heimildir til þess að beita virkum tálbeitum, það er að segja, að hafa frumkvæðið að því að ná sambandi við kynferðisbrotamenn á Netinu í þeim tilgangi að taka þá úr umferð.

Björgvin G. Sigurðsson formaður nefndarinnar segir að flestir gestanna hafi verið sammála um að lagaramminn í þessum málum hér á landi sé nokkurnveginn í lagi þótt ýmislegt þurfi að bæta.

„Eins og var bent þarna af barnaverndarstofu og fleiri aðilum, þá er netið framtíðarbrotavettvangurinn, eins og þetta hefur þróast á síðustu árum," segir hann.

Björgvin segir að í svona stórum réttlætismálum sé nauðsynlegt að beita róttækum úrræðum og því sé hann fylgjandi því að lögregla fái víðtækari heimdildir í þessa veru.

Sigríður J. Friðjónsdóttir ríkissaksóknari var á meðal fundargesta. Hún bendir á að lögreglan hafi nú þegar heimildir til að beita tálbeitum upp að vissu marki.

Sigríður bendir þó á að Netið hafi gert það að verkum að breyttar aðstæður séu fyrir hendi.

„En hvort að við viljum fara þessa leið, sem er að meginstefnu ekki í samræmi við mannréttindasáttmála Evrópu, og okkar lagaumhverfi, það yrði þá að skoða það vandlega hvort að hægt væri að bæta þetta í okkar tilfelli," segir hún.