Miklar skemmdir urðu á raforkulínum

Raforkumálin á Vestfjörðum eru komin í samt lag eftir að óveður síðustu daga olli víðtæku rafmagnsleysi á svæðinu. Orkubússtjóri segir að nú verði sest yfir atburði síðustu daga og reynt að meta hvað betur megi fara í raforkumálum Vestfirðinga.

Miklar skemmdir urðu á raforkulínum í óveðrinu og þá komu upp bilanir í varaaflvélum sem eiga að sjá fólki fyrir rafmagni þegar línurnar detta út. Þá mátti litlu muna að fjarskiptakerfi færu algerlega á hliðina af völdum rafmagnsleysisins og hitinn fór af víða þar sem hús eru rafhituð.

„Vissulega má draga einvherja lærdóma af þessu og við munum fara yfir atburðarrásina og gera okkur grein fyrir því hvar kann að hafa farið úrskeiðis. En það er ekki kominn tími til að segja nákvæmlega hvað það var," segir Kristján Haraldsson, orkustjóri.

Kristján segir að varaaflvélar á svæðinu séu komnar til ára sinna.

„Í keyrslunni þá biluðu því miður fjórar vélar. En það tókst að gera við þær allar á fyrsta laugardeginum. Þannig að þeir sem urðu lengst rafmagnslausir á Ísafirði urðu það vegna þess að það bilaði spennustöð í einu hverfinu. Þá hefði ekki skipt neinu máli þó að varaaflið hefði verið í lagi," segir hann.

Að sögn Kristjáns er Landsnet með áform um að byggja tíu megavatta díselrafstöð í Bolungarvík og hefði hún verið komin í gagnið hefði hún dugað til að koma í veg fyrir vandræði á norðanverðum vestfjörðum.

Fjarskiptin á svæðinu fóru einnig úr skorðum og mátti litlu muna að geymahleðslur hefðu alfarið klárast.

„Það er alveg klárt að fjarskiptin verða að vera í lagi og við þurfum að koma rafmagni eins fljótt og hægt er," segir hann og þakkar starfsmönnum orkubúsins fyrir vel unnin störf.

En þrátt fyrir vandræði síðustu daga sáu heimamenn þó ljósa punkta í myrkrinu og þótti rafmagnsleysið kósí og rómantískt.

Og við þetta má bæta að ákveðið hefur verið að loka svæðinu norðan göngubrúar í Hvosinni á Hofsósi vegna snjóflóðahættu. Miklar snjóhengjur eru í bökkunum þar fyrir ofan og talin er hætta á að þær falli fram.