Afritaði segulröndina og misnotaði í Macy‘s

„Ég var mjög hissa,“ segir Atli Fannar Bjarkason, aðstoðarmaður Guðmundar Steingrímssonar alþingismanns, sem uppgötvaði í gær að 70 þúsund krónur vantaði inn á bankareikning hans. Í ljós kom að óprúttinn aðili hafði afritað upplýsingar af debetkorti Atla og notað þær til að kaupa vörur fyrir um 500 Bandaríkjadali í versluninni Macy"s í Bandaríkjunum.

„Ég var eiginlega með böggum hildar allan morguninn yfir því hversu litla yfirsýn ég hefði yfir eigin eyðslu. Ég horfði á rigninguna dynja á glugga skrifstofu minnar á meðan ég hugsaði hvað hún móðir mín myndi segja við þessu,“ segir Atli Fannar léttur. Það var þegar Atli hafði samband við bankann sem upp úr dúrnum kom að eitthvað misjafnt hafði átt sér stað. Hann hafði í kjölfarið samband við Valitor sem lokaði kortinu samstundis.

„Þeir sögðu mér að einhver hefði sennilega náð að afrita segulröndina á kortinu í gegnum afritunarbúnað í hraðbanka eða posa í verslun,“ segir Atli. Málið er nú í höndum Valitors og Atli býst við að það endi vel. Bergsveinn Sampsted, framkvæmdastjóri kortaútgáfu Valitors, segir kortaútgefendur sífellt glíma við svikahrappa sem verði æ tæknivæddari. Í þeim tilfellum sem Valitor þekki til sé settur upp hlerunarbúnaður í hraðbanka sem skimi segulrönd og taki myndir af pinnúmerinu. Kortin séu síðan afrituð og búin til ný eintök sem komið sé í umferð.

Bergveinn segir að einnig komi fyrir að kortin séu afrituð þar sem einstaklingur lætur þau af hendi, til dæmis á veitingastöðum. Hann segir kortasamsteypurnar gera allt sem í þeirra valdi stendur til að verja kortaeigendur fyrir tjóni þegar upp kemst um svik. „Þá hefst eltingarleikur þar sem við reynum að hafa uppi á svikahröppunum. Þetta er eitt af því sem við erum að glíma við. Umfangið er ekkert gríðarlegt en fyrir þann sem lendir í slíku getur tjónið verið mikið, fyrir utan óþægindin að lenda í slíku,“ segir Bergsveinn Sampsted.