Þegar George Weah skaut Val út úr Evrópu

Kolbeinn Tumi Daðason skrifar 17. desember 2013 12:45

Valsmenn veittu frönsku meisturunum í AS Monaco svo sannarlega verðuga keppni í 1. umferð Evrópukeppni Meistaraliða árið 1988.

Valsmenn höfðu á að skipa frábæru liði og gerðu sér lítið fyrir og unnu 1-0 sigur í fyrri leiknum á Laugardalsvelli. Atli Eðvaldsson, sem lék sem afturliggjandi framherji í leiknum, skoraði sigurmarkið á 56. mínútu eftir fyrirgjöf frá Val Valssyni.

„Heppnin var með okkur,“ sagði Arsene Wenger, þjálfari Monaco, sem þótti sitt lið sleppa vel frá Laugardalsvelli með eins marks tap. Enski landsliðsmaðurinn Glenn Hoddle sagði Valsliðið hafa minnt sig á lið Wimbledon á Englandi.

„Við hefðum samt vel getað tapað 3-0,“ sagði Hoddle um Valsliðið sem þótti sitt lið sleppa vel frá Laugardalsvelli með eins marks tap. Enski landsliðsmaðurinn Glenn Hoddle sagði Valsliðið hafa minnt sig á lið Wimbledon á Englandi.

Meðal leikmanna Monaco í leiknum voru frönsku landsliðsmennirnir Manuel Amoros, Patrick Battiston auk Hoddle og þekkts framherja sem átti eftir að gera gæfumuninn fyrir franska liðið í síðari leiknum.

Í síðari leiknum í Frakklandi var það markvörður Valsmanna, Guðmundur H. Baldursson, sem varð fyrir því óláni að skora sjálfsmark á 15. mínútu. Guðmundi mistókst að grípa hornspyrnu, reyndi svo að spyrna knettinum frá en ekki vildi betur til en svo að boltinn fór af stönginni og í netið. Sigurmarkið var þó af dýrari gerðinni.

Líberíumaður nokkur að nafni George Weah tók þá boltann niður af mikilli snilld við miðjuhringinn. Skipti engum toga heldur hljóp hann rakleiðis í átt að marki og lét svo vaða af löngu færi. Í markhorninu hafnaði boltinn með þvílíkum krafti að Guðmundur í markinu átti ekki möguleika.

„Ég lék á tvo menn og leit þá upp og sá möguleikann á að skjóta. Ég hitti boltann vel og það er reglulega gaman að skora svona mark. Vörn Vals er erfið viðureignar og vel skipulögð,“ sagði Weah í leikslok.

Valsmenn féllu því úr leik 2-1 samanlagt.

Markið frá Weah má sjá í stuttri samantekt úr leiknum hér að ofan.

Fótbolti Íslenski boltinn

Mest lesið

Fleiri fréttir