Rannsókn á skotárás í Hraunbæ vel á veg komin

Rannsókn ríkissaksóknara vegna skotárásar í Hraunbæ í byrjun mánaðarins er vel á veg komin. Teknar hafa verið skýrslur af 15 lögreglumönnum sem höfðu stöðu vitna.

Á vefsíðu Ríkissaksóknara segir að rannsakendur við Tæknideild lögreglustjórans á höfuðborgarsvæðinu, sem sinnir verkefnum á landsvísu, vinni að þeim tæknirannsóknum sem þörf er á í málinu, að höfðu samráði við og undir stjórn ríkissaksóknara, líkt og rannsakendur við embætti sérstaks saksóknara, sem hafa unnið að ofangreindum skýrslutökum af lögreglumönnum.

Niðurstaða rannsóknar ríkissaksóknara verður gerð opinber, en ekki er ljóst hvenær henni lýkur.