Loka deild vegna sýkingar

Blóðlækningadeild Landspítalans var lokað í gær vegna bakteríusýkingar sem greindist á deildinni. Stofn bakteríunnar sem greindist er ónæmur fyrir sýklalyfjum. Hann er landlægur á spítölum erlendis en sjaldgæfur hér á landi.

Deildin verður lokuð þangað til sýni hafa verið ræktuð úr öllum sjúklingum sem þar voru fyrir, og í það minnsta fram á mánudag. Yfirlæknir deildarinnar segir sýkinguna undirstrika mikilvægi þess að húsnæði spítalans verði bætt.

Hlíf Steingrímsdóttir, yfirlæknir á blóðsjúkdómadeild, segir að ónæmi fyrir sýklalyfjum einkenni þann stofn bakteríunnar sem greindist í gær. Hún sé hins vegar hluti af umhverfinu og yfirleitt ekki mjög skaðleg. Það sé hins vegar alvarlegt þegar hún komi upp á blóðlækningadeild spítalans.

„Þetta er landlægt á mörgum spítölum erlendis en við höfum verið blessunarlega laus við þetta hér. Reyndar kom þetta upp á deildinni fyrir þremur árum en þá tókst okkur að halda þessu í skefjum og koma í veg fyrir frekari smit. Svo kemur þetta upp óvænt núna og við grípum til viðeigandi aðgerða; tökum ekki inn nýja sjúklinga og setjum þá sem eru á deildinni í sérstaka einangrun, svokallaða smitgát."

Deildin er eina sérhæfðu blóðlækningadeild landsins. Þar dvelst fólk sem haldið er ýmsum illkynja blóðsjúkdómum á borð við hvítblæði og eitlakrabbamein. Sjúklingarnir eiga það flestir sameiginlegt að vera mjög viðkvæmir fyrir ýmiss konar sýkingum.

Hlíf segir að ákveðið hafi verið að rækta sýni úr öllum fjórtán sjúklingunum á deildinni til að ganga úr skugga um að sýkingin hafi ekki breiðst út. Eins sé það forvörn sem miði að því að stofn bakteríunnar nái ekki fótfestu hér á landi.

Á blóðlækningadeildinni eru fjórtán rúm; sex á einbýlum. Allt að fjórir sjúklingar eru um hvert salerni en oft kemur sú staða upp að vegna sýkingarhættu megi sjúklingar ekki deila salerni. „Þetta snýst um öryggi sjúklinga, og sérstaklega í ljósi svona sýkingarvarna," segir Hlíf.