Dæmdur í átta mánaða fangelsi fyrir stórfelldan fjárdrátt

Héraðsdómur Reykjaness dæmdi í dag karlmann í átta mánaða fangelsi, þar af eru sex mánuðir skilorðsbundnir, fyrir fjárdrátt, en brot hans var stórfellt.

Maðurinn var dæmdur fyrir að hafa dregið að sér tæplega 16 milljónir sem prókúruhafi einkahlutafélagsins A.S. Helgason þegar hann millifærði pening af bankareikning félagsins inn á eigin reikning í alls tuttugu skipti. Maðurinn ráðstafaði svo peningunum í eigin þágu og málarekstur í Serbíu sem varðaði lögaðila óskyldan einkahlutafélaginu.

Maðurinn krafðist sýknu á þeirri forsendu að hann faldi aldrei gjörning sinn og að hann hafi ekki dregið sér féð heldur fengið þá að láni hjá A.S. Helgasyni. Hann hafi því haft heimildir til að ráðstafa umræddum fjármunum og hafi það ekki verið saknæmt að hans mati.

Þessu er þó dómari ósammála og segir í niðurstöðu dómsins að brotið sér stórfellt og varð að auki til þess að félagið var úrskurðað gjaldþrota í kjölfarið. Einbeittur ásetningur hin dæmda hafi legið að baki en hann hafi haft mikla hagnaðarvon gengju áætlanir hans eftir.

Í ljósi þess að maðurinn játaði brot sín greiðlega og að hann hefur ekki áður verið gerð refsing þykir rétt að skilorðsbinda sex mánuði af átta til þriggja ára. Þá er honum gert að endurgreiða þrotabúi félagsins alla upphæðina, eða 15.7 milljónir króna.