Sjúkraþjálfarar vilja líka viðbótarfjármagn

Félag sjúkraþjálfara fagnar þeirri ákvörðun ríkisstjórnarinnar að ráðast í jafnlaunaátak með aðgerðum til að rétta hlut starfsstétta þar sem konur eru í miklum meirihluta.

Í ályktun frá Félagi sjúkraþjálfara segir að sjúkraþjálfarar á Landspítalanum, sem að stærstum hluta eru konur, vinni nú að endurskoðun á stofnanasamningi, sem hluta af kjarasamningi sem gerður var árið 2011. Stjórnendur Landspítala hafa látið það í ljós að ekki sé hægt að hækka laun hjá heilbrigðisstéttum nema að til komi viðbótarfjármagn frá stjórnvöldum.

Stjórnvöld hafa lofað fjármagni til að liðka fyrir kjaradeilu hjúkrunarfræðinga og fer Félag sjúkraþjálfara fram á að slíkt hið sama verði gert varðandi sjúkraþjálfara svo hægt verði að ljúka gerð stofnanasamninga við sjúkraþjálfara.