Brennuvargur í tveggja vikna gæsluvarðhald

Hælisleitandinn, sem kveikti í gistiheimilinu Fit-Hostel í Njarðvík á mánudag, hefur verið úrskurðaður i tveggja vikna gæsluvarðhald. Við yfirheyrslur hefur maðurinn, sem er Afgani, viðurkennt að hafa kveikt í, inni í sínu eigin herbergi. Hann vill hinsvegar ekki tjá sig nánar um málið. Lögregla hefur óskað eftir að hann verði látinn sæta geðrannsókn, en dómari hefur ekki tekið afstöðu til þess.

Honum er þó haldið áfram í varðhaldinu, á þeim grundvelli að með því sé verið að tryggja öryggi annarra dvalargesta á gistiheimilinu. Töluvert tjón varð á húsnæðinu og hafa iðnaðarmenn unnið hörðum höndum að lagfæringum síðan. Þar mun nú allt vera að komast í fyrra horf.-