Hagsmunum fatlaðra betur borgið innan ESB

Ný skýrsla sem Öryrkjubandalag Íslands lét vinna kemst að þeirri niðurstöðu að hagsmunum fatlaðs fólks á Íslands sé betur borgið með aðild Íslands að Evrópusambandinu.

Rannsóknarsetur í fötlunarfræðum við Háskóla Íslands vann að skýrslunni sem ber heitið „Er hagsmunum fatlaðs fólks á Íslandi betur borgið með eða án aðildar að Evrópusambandinu?" Í niðurstöðum hennar segir að afar mikilvægt sé að taka fram að aðild að Evrópusambandinu skapi tækifæri til jákvæðrar þróunar en tryggi hana þó ekki.

„Til að aðild að ESB skili jákvæðum áhrifum þurfa stjórnvöld á öllum stigum, stjórnsýsla, fagfólk og ekki síst hagsmunasamtök fatlaðs fólks að nýta sér þau tækifæri og möguleika sem faglegt starf, framsækin stefna og lagasetningar ESB veita. Í framkvæmd vegur það þyngst hvort stjórnvöld og hagsmunasamtök á Íslandi nota sér þau tækifæri sem aðild að ESB býður," eins og segir í skýrslunni.

Í skýrslunni er lögð áhersla á að Evrópusambandið sé ákaflega flókið og til að gera umfjöllun aðgengilega hafi ýmislegt varðandi starfsemi, uppbyggingu og stofnanir þess verið einfaldað. Þá er ítrekað að einungis sé tekið tillit til hagsmuna sem varða málefni fatlaðs fólks og ekki tekið mið af neinum öðrum hagsmunum sem snerti aðild Íslands að ESB.

Nánari upplýsingar um skýrsluna má sjá á vef Blindrafélagsins þar sem skýrslan er aðgengileg í heild sinni.