Strandaglópar leituðu skjóls hjá Matís - tugir fastir hjá Strætó

„Það voru fjórir í mat hjá okkur, en sex leituðu til okkar út af veðrinu," segir Guðlaug Þóra Marinósdóttir, skrifstofustjóri hjá Matís, en sex veðurtepptir ökumenn leituðu til þeirra í morgun vegna óveðursins.

Matís er til húsa á Vínlandsleið í Grafarholti, rétt hjá Vesturlandsvegi, þar sem ökumenn hafa þurft að sitja í allan dag. Guðlaug Þóra segir að einn ökumannanna hafi verið orðinn bíllaus og kaldur, því hafi hann freistast til þess að leita í næsta hús sem hann fann. Hinir komu skömmu síðar.

„Við gáfum þeim bara kaffi og svo buðum við þeim upp á mat í hádeginu," segir Guðlaug Þóra um þessar sérkennilegu aðstæður sem mynduðust í morgun á Vesturlandsveginum. Hún segir að einn mannanna hafi átt félaga sem komu á vel búnum jeppum, en þeir skutluðu hinum strandaglópunum einnig heim.

„Þannig móttakan er allavega tóm núna, en allir eru auðvitað velkomnir," segir Guðlaug.

Það voru fleiri strandaglópar sem máttu sætta sig við að dúsa á og við Vesturlandsveginn í dag. Fyrir utan alla þá sem sátu í bílum sínum í morgun hringdi farþega úr strætó í fréttastofuna í morgun og sagði um 30-40 farþega strandaða hjá Strætó upp á Hesthálsi.

Farþeginn sagði farþegana í góðu yfirlæti, með teppi og kakó og svo var boðið upp á mat í hádeginu.

Ekki náðist í Reyni Jónsson framkvæmdastjóra Strætó við vinnslu fréttarinnar.