„Vilji allra að fara eftir settum reglum“

Íslandsdeild Evrópuráðsþingsins verður svipt atkvæðisrétti á næsta þingi verði kynjahlutföllum ekki breytt. Nefndin fær þó að ljúka sumarþinginu, sem nú fer fram í Strassborg, með óbreyttri skipan.

Ögmundur Jónasson, einn nefndarmanna, segir þetta vissulega óheppilegt fyrir Ísland. Það sé þó lítið sem nefndarmenn sjálfir hafi getað gert, ákvörðunin hafi verið Alþingis.

„Það eru þingflokkarnir sjálfir sem sjá um tilnefningarnar og það fór því miður svo að fulltrúarnir voru allir karlar. En ég held að það sé að sjálfsögðu vilji allra að fara eftir settum reglum.“

Í vikunni gerði hópur þingmanna alvarlegar athugasemdir við skipan Íslandsdeildarinnar sem samræmist ekki reglum um kynjakvóta. Þingskapa- og stofnananefnd Evrópuráðsþingsins ályktaði í kjölfarið um Íslandsdeildina.

Íslensku nefndina skipa þrír þingmenn, þeir Brynjar Níelsson, Ögmundur Jónasson og Karl Garðarsson. Tvær konur eru varamenn og því ekki viðstaddar þingið sjálft.

Spurður hvort ekki hefði verið eðlilegast í stöðunni að taka inn varamann sagði Ögmundur: „Það má svo sem alveg spyrja að því. Minn varamaður er reyndar líka karl svo fyrir mitt leyti hefði það haft frekar lítið að segja.“

Samkvæmt reglum Evrópuráðsins mega nefndarmennirnir þrír aldrei vera allir af sama kyni. Þetta er gert til þess að tryggja jafna ákvarðanatöku beggja kynja í málefnum Evrópuráðsins.

Þá sagði Horst Schade, skrifstofustjóri þingsins, í samtali við fréttastofu að öllum aðildarríkjum ætti að vera ljóst hvernig reglurnar eru og að sér þættu þessi mistök Íslandsdeildarinnar frekar til þess fallin að rýra trúverðugleika hennar.