Umboðsmaður ætlar að rannsaka handtöku unglingsstúlkna

Settur umboðsmaður Alþingis hefur óskað eftir því að lögreglustjórinn á höfuðborgarsvæðinu afhendi sér öll gögn sem liggja fyrir um atvik sem átti sér stað aðfaranótt 24. júní síðastliðinn, þegar lögregla veitti tveimur þrettán ára stúlkum á léttu bifhjóli eftirför, stöðvaði akstur þeirra og færði þær í handjárn, sem og þá rannsókn sem fór fram á atvikinu af hálfu lögreglu.

Þetta kemur fram á heimasíðu Umboðsmanns Alþingis.

Þar segir ennfremur að upplýsinganna sé óskað til þess að settur umboðsmaður geti metið hvort ástæða sé til að taka atvikið til frekari athugunar að eigin frumkvæði.

Aðstandandi annarrar stúlkunnar sendi fréttastofu póst sama dag og fréttir birtust um málið. Sá hélt því fram að stúlkurnar hefðu verið beittar harðræði af hálfu lögreglunnar.

Lögreglan sendi tilkynningu eftir atvikið, þar sem fram kom að stúlkurnar höfðu veist að þeim við handtöku.