Lygi en ekki misskilningur hjá Kára

„Hvers vegna giftur tveggja barna faðir fórnar atvinnu sinni og jafnvel lífi til þess að spila landsleik finnst mér óskiljanlegt," segir Björn Seipp framkvæmdarstjóri þýska handknattleiksfélagsins Wetzlar.

Seipp er harðorður í garð Kára Kristjáns Kristjánssonar á vefsíðu félagsins í dag. Þræta þeir fyrir að Kári Kristján hafi nokkurnt tímann fengið leyfi hjá læknum þýska liðsins að spila landsleikina gegn Slóveníu.

„Að Kári hafi fengið grænt ljós hjá læknum liðsins, Marco Ketturkat og Frank Thiel, þess efnis að fá að fara fyrr af sjúkralistanum er einfaldlega lygi. Um engan misskilning hjá læknunum og Kára Kristjáni er að ræða," segir Seipp.

Forráðamenn Wetzlar minna á að Kári hafi gengist undir aðgerð í lok febrúar. Hann hafi svo fengið skýr fyrirmæli um að hann yrði að taka því rólega í að minnsta kosti sex vikur að aðgerðinni lokinni áður en hann myndi hefja æfingar.

„Það er með öllu óskiljanlegt að hann geti spilað landsleiki þegar hann hefur ekki enn hafið æfingar," segir Seipp.

Hann segir að Kári hafi rætt við sig og þjálfarann Kai Wandschneider í marslok að fá að hitta lækna íslenska liðsins í landsleikahlénu. Hann hafi viljað fá álit læknanna um áframhald á endurhæfingu sinni.

„Svo fréttum við í gegnum íslenska fjölmiðla að Kári væri á leiðinni með íslenska landsliðinu til Slóveníu," segir Seipp. Hann fullyrðir að forráðamenn Wetzlar hefðu gripið inn í hefðu þeir haft fregnir af ætlunum Kára fyrr.

Seipp segir ljóst að Kári spili ekki aftur fyrir Wetzlar.

„Riftun samningsins er byggð á staðreyndum og alfarið hegðun leikmannsins að kenna," segir Seipp á heimasíðu Wetzlar.