Stingur upp á nýrri fjárfestingarleið

Erlend kvikmyndafyrirtæki hafa sýnt því áhuga að nýta sér fjárfestingarleið Seðlabankans til að fjárfesta í kvikmyndaverkefnum hér á landi. Leifur B. Dagfinnsson, framleiðandi hjá True North, segir binditímann sem leiðin felur í sér þó standa í fyrirtækjunum og talar fyrir sérsniðinni leið fyrir kvikmyndafjárfestingu.

„Mín hugmynd er sú að erlendar bíómyndir fengju að koma með aflandskrónur inn í hagkerfið á hagstæðu gengi gegn því að skuldbinda sig til að gera kannski tvær myndir á Íslandi yfir til dæmis þriggja ára tímabil," segir Leifur.

Fjárfestingarleið Seðlabankans er skref í áætlun stjórnvalda um losun gjaldeyrishafta. Hún felur í stuttu máli í sér að bankinn kaupir gjaldeyri í skiptum fyrir krónur gegn því að þær séu nýttar til fjárfestingar hér til fimm ára hið minnsta. Gulrótin er sú að þátttakendur fá hagstæðara gengi en ella en afslátturinn hefur verið um 16% í síðustu útboðum. Þá getur leiðin nýst eigendum aflandskróna.

„Í fjárfestingarleiðinni er fimm ára binditími. Það stendur í kvikmyndafyrirtækjum. Ef þessi binditími yrði styttur í tilfelli þeirra þá er ég þess fullviss að þau myndu sýna þessu mikinn áhuga," segir Leifur og heldur áfram: „Þá væri Ísland skyndilega orðinn mjög samkeppnishæfur staður til að taka upp myndir sem gæti leitt til þess að ýmis eftirvinnsla færi einnig fram hér á landi. Þannig gæti þetta orðið meiri heilsársatvinnugrein og styrkt innlenda kvikmyndagerð."

Leifur segist ekki hafa rætt þetta formlega við stjórnvöld en bætir við að hugmyndin hafi fengið góðan hljómgrunn hjá þeim sem hann hafi nefnt hana við.