Óþarft er að örvænta þótt frostið bíti brátt í blöðin

Hlýindin undanfarna daga hafa gefið okkur sumum græna runna og blómstrandi garða. Þó er spáð frosti í lok vikunnar og segir garðyrkjufræðingur helsta áhyggjuefnið vera rætur sem gætu skaðast ef jörð er mjög blaut.

Íslendingar þurfa ekki að örvænta þótt frostið taki að læsa sig í nýju brumin á garðrunnum og blóm haustlaukanna þegar líða tekur á vikuna.

Glöggir garðyrkjuáhugamenn hafa eflaust séð græn lauf og fagurlita krókusa gægjast fram eftir hlýindin á landinu undanfarna daga, en það eru bláar tölur í kortunum sem geta gert að verkum að viðkvæmar plöntur sem eru komnar langt af stað kelur eða þær skemmast.

Kristinn Þorsteinsson, garðyrkjufræðingur og fræðslustjóri Garðyrkjufélags Íslands, segir helsta áhyggjuefnið vera frost í jörð þegar jarðvegur er mjög blautur eins og á höfuðborgarsvæðinu eftir miklar rigningar.

„Á yngri plöntur getur komið rótarskaði ef jarðvegurinn þenst mikið út í frostinu," segir Kristinn. „En maður sér þetta nánast á hverju ári, að gróðurinn fer af stað í hitatíð og svo kemur frost, án þess að maður þurfti að óttast skaða. Þetta er plöntunum eðlilegt."

Hann segir að nú sé tíminn til að klippa niður runna og tré fyrir sumarið. Þó er betra að bíða lengur fram á vorið með viðkvæmari plöntur eins og ágræddar rósir. Misplar, toppar og fleiri runnategundir sem eru farnar að grænka, eru harðgerðari og þola vel litlar frosthörkur þótt blaðhlífar séu komnar í ljós.

„Ég hef ekki neinar sérstakar áhyggjur af því sem er að gerast þessa stundina, en ég hefði ekki viljað sjá hitann vera deginum lengur," segir Kristinn.