Þykir Kim ósmekkleg

Kim Kardashian hyggst hanna barnafatalínu fyrir tilstuðlan kærasta síns, rapparans Kanye West. Samkvæmt heimildum Radaronline hefur West þó yfirumsjón með verkefninu.

„Hann vill stjórna öllu og leyfir Kim ekki að stýra hönnunarferlinu einni. Hann opnaði dyrnar fyrir hana, en þetta gerir Kim brjálaða,“ hafði vefsíðan eftir heimildarmanni sínum.

„Honum finnst Kim ekki nógu smekkleg til að sjá um þetta ein. Eftir fyrirlestur Kanye er Kim allt í einu farin að hanna einfaldan barnafatnað með hreinar línur, sem er einmitt stíllinn sem Kanye hrífst af.“

Parið eignaðist sitt fyrsta barn saman í júní á þessu ári og nefndu það North West.