Biðlaunaréttur upp á 121 milljón króna

Biðlaunaréttur þingmanna, ráðherra og aðstoðarmanna ráðherra nemur 121.190.484 krónum. Óvíst er hvort allir nýti sér rétt sinn og taki þeir að sér önnur störf dragast launin frá biðlaunaréttinum.

Alls luku 27 þingmenn störfum á Alþingi eftir nýafstaðnar kosningar. Sumir þeirra náðu ekki kjöri en aðrir höfðu ákveðið að gefa ekki kost á sér. Þessir þingmenn eiga allir rétt á biðlaunum. Þeir sem hafa setið lengur en eitt kjörtímabil eiga rétt á sex mánaða biðlaunum. Þeir sem hins vegar hafa aðeins setið eitt kjörtímabil, eða skemur, eiga rétt á þriggja mánaða biðlaunum. Þá skiptir engu hvort þeir sátu allt kjörtímabilið eða aðeins nokkra mánuði. Þingfararkaupið er 630.025 krónur á mánuði.

Laun ráðherra samanstanda af þingfararkaupi og ráðherraálagi. Forsætisráðherra er með 1.231.092 krónur á mánuði, en aðrir ráðherrar 1.112.606 krónur.

Jóhanna Sigurðardóttir forsætisráðherra á rétt á sex mánaða biðlaunum, eða tæplega 7,4 milljónum króna. Hún hættir bæði sem ráðherra og þingmaður og er því talin báðum megin í þessu uppgjöri, þar sem laun hennar eru tvískipt. Hún á hins vegar rétt á því að fara á eftirlaun og því er óvíst hvort hún þiggur biðlaun.

Hinir sjö ráðherrarnir sitja allir áfram á Alþingi. Þeir eiga þó rétt á biðlaunum vegna ráðherrahluta launanna, eða 482.581 krónu, í sex mánuði, samtals 3,6 milljónir króna hver ráðherra.

Aðstoðarmenn ráðherra eru 11 talsins og þeir fá sömu laun og skrifstofustjórar, eða 715.235 krónur á mánuði. Þeir eiga rétt á þriggja mánaða biðlaunum, eða rúmlega 2,1 milljón króna hver.

kolbeinn@frettabladid.is