Hæpnar forsendur lögreglu

Lögmaður VIP Club segir tálbeitur lögreglu hafa boðið fíkniefni í skiptum fyrir kynlífsþjónustu. Lektor í lögum segir aðferðir lögreglu vafasamar.

Fimm óeinkennisklæddir lögreglumenn rannsökuðu starfsemi VIP Club á Austurstræti þann 21. september síðastliðinn. Grunur lék þar færi fram milliganga um vændi. Þessir lögreglumenn lýsa upplifun sinni og samskiptum við starfsfólk í lögregluskýrslu sem fréttastofa hefur undir höndum.

Lögregla synjaði staðnum um rekstrarleyfi en 14. nóvember var lögreglustjóranum á höfuðborgarsvæðinu gert, af hálfu atvinnuvega- og nýsköpunarráðuneytisins, að veita staðnum rekstrarleyfi.

Á grundvelli nýs og tímabundins rekstrarleyfis var VIP Club opnaður á ný föstudaginn síðstliðinn. Aðfaranótt laugardags fór 20 manna lögregluteymi inn á staðinn og lokaði. Var þetta gert á þeim forsendum að rökstuddur grunur hafi verið um vændisstarfsemi.

Starfsmenn VIP sem fréttastofa ræddi við í dag fullyrða með tölu að ekkert sé til í því að vændi eða milliganga um vændi fari fram á staðnum.

Áfengi, kókaín, peningar

Lögmaður eigenda VIP Club, hefur kært lögreglu fyrir þessa aðgerð. Í kærunni kemur einnig fram að lögreglumennirnir hafi, 21. september, gert ítrekaðar tilraunir til að kaupa vændi bæði með áfengi og kókaíni.

Stefán Eiríksson, lögreglustjóri á höfuðborgarsvæðinu, sagði í samtali við Vísi í dag að engin lögbrot hafi verið framin af hálfu lögreglu. Ásakanir sem þessar séu ekki svaraverðar.

Það eru ekki síst sjálfar aðferðir lögreglunnar sem vekja upp spurningar. Tveir lögreglumenn greina frá því í skýrslunni að þeir hafi drukkið áfengi, þar á meðal áttatíu þúsund króna kampavínsflösku. Einn lögreglumaður greinir frá því að hann hafi hellt viljandi úr glasi sínu þegar enginn sá til.

Hæpnar forsendur

Jón Þór Ólason, lektor í lagadeild Háskóla Íslands, segir margt ábótavant í skýrslu lögreglu. Hann ítrekar að nauðsynlegt sé að stemma stigum við vændi en að sama skapi sé mikilvægt að fylgja settum reglum. Hann segir það vera óljóst hvort að aðgerðirnar hafi beinst að rekstrarleyfi staðarins eða vegna þess að gert væri út á nekt starfsmanna.

„Ef að þessar aðgerðir beinast að rekstrarleyfinu þá er hún náttúrulega algjörlega ólögmæt og í andstöðu við þær reglur sem eru um slíkar aðgerðir, það er, þar sem tálbeitur koma við sögu,“ segir Jón Þór.

Jón bendir á að sjálf forsenda málsins, að gert væri út á nekt starfsmanna, sé hæpin. Það er ekki refsivert brot í lögum, þar af leiðandi væri ekki forsenda fyrir aðgerð af þessu tagi eins og lög um tálbeitur segja til um.

„Tálbeitur eiga að beinast að því að sakborningum. Þessar stúlkur, þær geta ekki orðið sakborningar. Þannig að ég get ekki séð það að notkun tálbeita gagnvart þeim sé í samræmi við reglur,“ segir Jón Þór og bætir við: „Ef að þetta er það eina sem liggur fyrir í gögnum lögreglu þá er það kannski svolítið þunnur þrettándi.“