Hlýtur Djúpið tilnefningu? - Kvikmyndaáhugamenn ekki bjartsýnir

Kvikmyndaáhugamenn eru ekki bjartsýnir á að kvikmynd Baltasars Kormáks, Djúpið, hljóti tilnefningu til Óskarsverðlauna á morgun miðað við óformlega könnun fréttastofu. Einungis ein heimasíða spáir því að Djúpið fái tilnefningu.

Kvikmyndin Djúpið er meðal þeirra níu erlendu kvikmynda sem eiga möguleika á að hreppa Óskarsverðlaunin í febrúar. Á morgun verður myndunum fækkað niður í fimm þegar opinberar tilnefningar Akademíunnar verða kynntar. Einungis ein íslensk mynd hefur hlotið þann heiður að vera tilnefnd til Óskarsverðlauna en það er myndin Börn Náttúrunnar í leikstjórn Friðriks Þórs Friðrikssonar.

En hversu líklegt er talið að Djúpið hljóti þessa eftirsóttu tilnefningu? Miðað við þær heimasíður sem fréttastofa skoðaði í dag telst það heldur ólíklegt. Margar álitlegar myndir eru meðal þeirra níu sem keppast um fimm tilnefningar og telja sérfræðingar nær öruggt að franska myndin he Intouchables, sem vakti mikla athygli hér á landi á síðasta ári, og austurríska myndin Amour hljóti tilnefningu. Reyndar telja margir að Amour hljóti tilnefningu til bestu myndar og gæti það aukið líkurnar á því að Djúpið komist á blað.

Ein heimasíða af átta sem fréttastofa skoðaði í dag setur Djúpið á lista yfir þær fimm myndir sem spáð er að fái tilnefningu en aðrar síður kvikmyndaáhugamanna setja myndina í sjöunda til níunda sæti margar síður nefna myndina þó sem verðugan keppinaut sem gæti komið á óvart. Val mismunandi aðila á lista er hins vegar mjög fjölbreytt og því er bara að bíða og sjá hvað gerist á morgun en tilnefningar til óskarsverðlauna verða tilkynntar um hálf tvö að íslenskum tíma.