Enn stefnir í vinnudeilu á Landspítala

„Kandídatarnir sem eru að útskrifast núna sendu Landspítalanum undirritað skjal þar sem þeir sögðust ekki geta unnið við þær aðstæður sem þar er boðið upp á, hvorki hvað varðar laun né starfsaðstöðu, og óskuðu eftir fundi með yfirmönnum spítalans,“ segir Ómar Sigurvin Gunnarsson, formaður Félags almennra lækna, um tildrög þess að mikill meirihluti kandídatanna hefur ekki ráðið sig til starfa á Landspítalanum eins og hefð hefur verið.

Um fimmtíu kandídatar útskrifast í vor og að sögn Ómars hefur venjan verið sú að tveir þriðju þeirra færu til starfa á LSH. Sú er ekki raunin nú.

„Það var einhver misskilningur í gangi hjá kandídötunum,“ segir Björn Zoëga, forstjóri LSH, spurður um niðurstöðu fundarins. „Þeir stóðu í þeirri meiningu að spítalinn semdi um launakjör við kandídata.“

Björn bendir á að fyrir það fyrsta sé enginn opinn kjarasamningur, auk þess sem Læknafélag Íslands semji um kjör við fjármálaráðuneytið. Aukinheldur séu kandídatar í allt annarri stöðu en venjulegir starfsmenn spítalans.

„Þeir eru að koma í svokallað starfsnám, sem er reyndar launað, en þeir þurfa að vinna þetta ár til að fá lækningaleyfi þannig að staða þeirra er ekki sambærileg stöðu annars starfsfólks,“ segir Björn. Farið hafi verið yfir starfsumhverfið og vinnuaðstöðuna með kandídötunum nú, líkt og gert sé á hverju ári.

„Algengt er að það sé misskilningur í gangi hjá ungu fólki þegar það kemur út á vinnumarkaðinn. Það reynir reyndar ekki á þetta fyrr en seinni hluta sumars því flestir eiga ekki að koma til vinnu fyrr en þá. Þeir sem áttu að byrja 1. júní skrifuðu margir undir eftir að hafa fengið þessar upplýsingar.“

Ómar er ekki sammála greiningu Björns á stöðu mála. „Auðvitað eru kjarasamningar í gildi en það eru lágmarkslaun og alþekkt að starfsmenn spítalans fái hærri laun en þeim nemur,“ segir hann. „Það er býsna stíft hljóð í hópnum og þessum viðræðum er engan veginn lokið,“ segir Ómar.

Björn segir það ekki setja starfsemi spítalans úr skorðum þótt kandídatarnir velji að fara annað. Það myndi hins vegar kalla á endurskipulagningu á starfseminni. „En ég vona að til þess komi ekki. Spítalinn virðir kjarasamninga og hefur alltaf gert.“