Lífshættuleg flog vegna lyfja

Ný samheitalyf við flogaveiki hafa að undanförnu orsakað alvarleg flog hjá sjúklingum. Dæmi eru um að einstaklingar sem hafa verið lausir við flog í mörg ár verði alvarlega veikir eftir að hafa verið teknir af lyfinu Keppra og settir á samheitalyf.

„Á síðustu mánuðum höfum við séð marga flogaveika sem fengið hafa flog eftir að hafa skipt úr Keppra í samheitalyf, jafnvel fólk sem ekki hefur fengið flog í mörg ár," segir Elías Ólafsson, yfirlæknir á taugalækningadeild Landspítalans. „Í sumum tilvikum er um að ræða mjög alvarleg flog, jafnvel lífshættuleg."

Um er að ræða þrjú samheitalyf Keppra við flogaveiki; Zelta, Mataver og Levetiracetam Actavis. Elías getur ekki fullyrt, á þessu stigi, að þetta gildi um þau öll.

Lyfjastofnun hafa borist tólf ábendingar vegna aukaverkana eða vanverkunar lyfjanna það sem af er ári, þar af sjö vegna Levetiracetam, fjórar vegna Mataver og eina vegna Zelta.

Elías segir þessa vanverkun lyfjanna hafa komið á óvart. „Við höfum haft samband við Landlækni og Lyfjastofnun vegna málsins og embættin hafa brugðist vel við," segir hann. Elías segir að það sé þessara aðila að ákvarða hvort reynt verði að kynna þetta mál sérstaklega fyrir almenningi.

Guðrún Gylfadóttir, deildarstjóri lyfjadeildar Sjúkratrygginga, segir stofnunina hafa heyrt af vandamálinu. Því hafi verið ákveðið að veita sjúkraskírteini vegna Keppra áfram, óski læknar eftir því fyrir sjúklinga sína, en með því er hægt að fá fulla greiðsluþátttöku þrátt fyrir að ódýrari samheitalyf séu á markaði.

Um 540 einstaklingar fengu ávísað Keppra í fyrra og var kostnaður Sjúkratrygginga um 152 milljónir króna.

„Læknir getur sótt um lyfjaskírteini fyrir Keppra í þeim tilvikum þegar samheitalyf reynast ekki jafn vel en einnig þegar læknir metur svo að breyting á lyfjameðferð sem búið er að stilla sjúkling inn á sé ekki réttlætanleg," segir Guðrún. Búið er að framvísa 150 slíkum skírteinum síðan í mars.

Mímir Arnórsson, deildarstjóri hjá Lyfjastofnun, segir samheitalyfin sem um ræðir hafa sama virka innihaldsefni og Keppra, en vissulega sé tekið mark á athugasemdum sem berast.

„Við höfum fengið ábendingar um þessi lyf og þá er þetta skráð sem vanverkun," segir hann. „Við söfnum þeim saman og ef slíkt er mjög títt þá getur það leitt til þess að lyfin verði tekin af markaði."

- sv