Leikur óvænt í Vesalingunum

„Þetta leggst vel í mig. Það er gaman að vera kominn þarna aftur,“ segir Þórhallur Sigurðsson, Laddi. Hann hefur tekið við hlutverki kráareigandans Thénardiers í söngleiknum Vesalingarnir sem verður frumsýndur í Þjóðleikhúsinu í mars. 22 ár eru liðin síðan Laddi steig síðast á fjalirnar í Þjóðleikhúsinu, eða þegar hann lék Fagin í söngleiknum Oliver!.

Hringt var í Ladda rétt fyrir áramót og hann beðinn um að taka að sér hlutverkið eftir að Örn Árnason heltist úr lestinni vegna anna með Spaugstofunni. „Það var eiginlega tekin ákvörðun á gamlársdag. Þetta gerðist svo snöggt að ég hafði ekki tíma til að segja nei.“

Æfingar fyrir Vesalingana eru nýhafnar og segist Laddi hafa verið svolítið nervus fyrstu dagana en allt eigi eftir að fara vel. Aðspurður segist hann vera í góðu söngformi, enda stóð hann sig með prýði í áramótaþætti Hljómskálans í Sjónvarpinu. „Það er búið að hrósa mér fyrir það, bæði fyrir Snjókorn falla og Búkollu, þannig að ég hlýt að vera í ágætisformi,“ segir hann hógvær. „Maður er svo sem ekkert sísyngjandi en ég hlýt að komast í gott form með því að syngja á hverjum degi.“

Með aðalhlutverkið í Vesalingunum fer Þór Breiðfjörð sem hefur sungið sama hlutverk á West End í London. Nokkrir leikarar koma fram í fyrsta sinn í Þjóðleikhúsinu í söngleiknum, eða þau Eyþór Ingi Gunnlaugsson, Bjarni Snæbjörnsson, Jana María Guðmundsdóttir og Orri Huginn Ágústsson.-fb