Frumvarpi um breytingar á stjórn fiskveiða líklega frestað fram á haust

Forystumenn ríkisstjórnarinnar ætla að gera úrslitatilraun í dag til að ná samkomulagi við formenn stjórnarandstöðuflokkanna um framhald þingstarfa. Allt bendir til þess að frumvarpi um breytingar á stjórn fiskveiða verði frestað fram á haust.

Forystumenn allra flokka funduðu í gærkvöldi og fram á nótt til að reyna ná samkomulagi um framhald þingstarfa. Miklar tafir hafa orðið vegna ágreinings um veiðigjaldafrumvarp ríkisstjórnarinnar en seint í gærkvöldi leit út fyrir að samkomulag væri augsýn um að ljúka þingstörfum í þessari viku.

Samkvæmt heimildum fréttastofu er það hluti af samkomulaginu að frumvarpi um breytingar á stjórn fiskveiða verði fresti fram á haust og einnig rammaáætlun um vernd og nýtingu náttúrusvæði.

Á móti mun alþingi afgreiða veiðigjaldafrumvarpið.

Sjálfstæðismenn hafa hins vegar lagt áherslu á að veiðigjöldin verði lækkuð miðað við núverandi frumvarp en ríkisstjórnin hefur ekki viljað fallast á það. Forystumenn ríkisstjórnarinnar ætla að funda með formönnum stjórnarandstöðuflokkanna í dag en þar verður gerð úrslitatilraun til að ná samkomulagi.

Náist samkomulag mun þingstörfum ljúka í síðasta lagi á laugardag en að öðrum kosti verður gert hlé á þingstörfum fram yfir forsetakosningar og þeim síðan framhaldið í júlí.