Sigurður Ingi: Málið strandar á Stefáni Eiríkssyni

Lögreglustjóri hefur hafnað beiðni forseta Alþingis um aðgang að skýrslu sem Geir Jón Þórisson, fyrrverandi yfirlögregluþjónn, vann um Búsáhaldabyltinguna. Að sögn Sigurðar Inga Jóhannssonar, þingmanns Framsóknarflokksins, verður allra leiða leitað til að skýrslan verði gerð ríkinu opinber.

Fjölmargir þingmenn hafa lýst yfir áhuga á því að sjá umrædda skýrslu en málið strandar á Stefáni Eiríkssyni, lögreglustjóra á höfuðborgarsvæðinu, „sem vill meina að skýrslan sé innanhússskýrsla fyrir sig, unnin úr gagnagrunni lögreglunnar og komi ekki öðrum við," segir Sigurður.

Upphaflega var það Gunnar Bragi Sveinsson, þingmaður Framsóknarflokks, sem bað upplýsingaþjónustu þingsins um skýrsluna en fékk ekki aðgang hjá lögreglu. Þá tók Sigurður Ingi málið upp í forsætisnefnd og fór fram á að forseti þingsins leitaði eftir aðgangi að skýrslunni, enda varðaði hún öryggismál þingsins. Því var einnig hafnað.

Nú síðast fór Jón Gunnarsson, þingmaður Sjálfstæðisflokksins, fram á aðgang að skýrslunni og lýsti mikilvægi þess að þingmenn kæmust í innihald hennar í ræðustól á Alþingi í gær.

„Við munum leita allra leiða til að þessi skýrsla verði gerð ríkinu opinber," segir Sigurður en veit sem stendur ekki hvernig það verður gert.

Skýrslan

Í skýrslunni er fjallað um mótmælin eftir hrunið 2008 og árásir á Alþingishúsið. Sigurður telur að þar komi fram upplýsingar um öryggismál þingsins sem nauðsynlegt er að komast yfir í því skyni að bæta öryggismál Alþingis eftir föngum.

Bloggarinn

Bloggarinn Eva Hauksdóttir fór fyrir sína parta einnig fram á að fá afrit af skýrslunni. Hún fékk sömuleiðis synjun hjá lögreglustjóra en brást við með því að kæra hann til úrskurðarnefndar um upplýsingamál vegna synjunarinnar. Frá þessu er greint á DV.is en ekki hefur fengist niðurstaða í kæruna.

Fundargerðin

Geir Jón Þórisson, fyrrverandi yfirlögregluþjónn, skrifaði umrædda skýrslu. Hann hélt því fram á fundi í Valhöll í gær að skýrslan væri byggð á upplýsingum frá alþingismönnum sjálfum og því lægju allar upplýsingar fyrir í fundargerð forsætisnefndar þingsins frá 21. janúar 2009. Því væri í raun óþarft að veita alþingismönnum sérstakan aðgang að skýrslunni.

Sigurður getur ekki upplýst um hvað nákvæmlega er í fundargerðinni sem Geir vísar til. „Fundargerðir forsætisnefndar eru ekki opinberar," segir hann. „Þar er samt fyrst og fremst verið að fjalla um hlut alþingismanna í mótmælunum eftir hrun en í skýrslunni teljum við að komi betur fram hvað þarf að bæta í öryggismálum þingsins og hvernig staðan er. Og það er þetta sem við erum að leita eftir," segir hann og telur því mikilvægt að þingmenn fái aðgang að skýrslunni.