Bilun veldur víðtæku rafmagnsleysi norðaustanlands

Rafmagnslaust er á stórum hluta norðausturlands en bilun er á stórri stofnlínu á milli Laxárvirkjunar og Kópaskers.

Pétur Vopni Sigurðsson hjá Rarik á Norðurlandi segir enn ekki vitað hvað olli bilunni á línunni. Þá hefur ísing myndast á línum í Mývatnssveit og í Bárðardal sem veldur rafmagnsleysi á þeim svæðum.

Að sögn Péturs er erfitt að segja til um hvenær málin komast í samt lag á ný, enn sé hvasst á svæðinu og ísing enn að myndast á línum.

Ísingin veldur því líka að línurnar liggja mun lægra en vanalega og eru ökumenn, og þá sérstaklega ökumenn hárra bíla, beðnir um að fara varlega.