Jólakveðja Elíasar: Kaupa reykskynjara og hætta að vera heimsk

Ungur karlmaður sem hætt var kominn í gær eftir að eldur kviknaði í fjölbýlishúsi við Laugaveg segist ekki ætla trassa að setja upp reykskynjara aftur á lífsleiðinni. Hann telur sekúndur hafa skilið milli lífs og dauða.

Elías Hrafn Pálsson slapp ómeiddur úr eldsvoða um hádegisbil í gær. Allt tiltækt slökkvilið höfuðborgarsvæðisins var kallað á vettvang en eldurinn kviknaði í tómri íbúð í fjölbýlishúsi við Laugaveg 51, fyrir neðan íbúð Elíasar. Sírenurnar voru það fyrsta sem vakti athygli hans á eldinum.

"Ég vakna við sírenurnar, lít út um gluggann og sé að það er 20 manna lið að ryðjast inn til mín. Þá opna ég svefnherbergið og sé að stofan er full af reyk."

Hann segir að hann hafi ekki áttað sig á alvarleika málsins strax. Hann hafi ætlað að rjúka út en ekki komist vegna reyks.

"Ég er ekki einu sinni með reykskynjara, mín eigin heimska varð mér að falli þarna. Ég opna útidyrahurðina og þá er bara allur gangurinn í mökk og ég sé ekki einu sinni tvo metra fram fyrir mig. Slökkviliðsmennirnir voru bara tvo metra fyrir framan mig og ég sá þá ekki," segir Elías og bætir við:

"Ég kallaði bara, strákar ég er hérna, ég er hérna, og þeir voru að leita að mér. Ég loka hurðinni aftur því ég er bara kafna. Ég hleyp svo aftur að herbergishurðinni og þá er herbergið mitt líka orðið fullt af reyk þótt ekki hafa liðið nema nokkrar sekúndur. Það var enginn reykur þar þegar ég fór út úr því. Þá veifaði ég til lögreglumannanna, hey strákar, og þeir komu auga á mig og hjálpuðu mér að klifra niður. Ef tíu til fimmtán sekúndur hefðu liðið til viðbótar stæði ég eflaust ekki hérna.

Hann vissi þó enn varla hvað hafði gerst þegar hann kom út. "Ég vissi ekkert hvað var í gangi. Ég var bara ný vaknaður, það leið bara ein mínúta frá því að ég vaknaði og frá því ég var allt í einu á sjúkrabörum."

Elíasi var samstundis gefið súrefni þegar hann kom út og dvaldi hann í um það bil þrjár klukkustundir á spítala á eftir. Hann reyndist aðeins hafa snert af reykeitrun en það segir hann hafa verið nógu vonda reynslu.

"Þegar ég kom út hrækti ég alveg kolsvörtu og lungun á mér alveg svört eftir þetta. Tíu sekúndur til viðbótar af þessum reyk hefðu sannarlega getað drepið mig."

Og þakklæti er Elíasi ofarlega í huga eftir þennan atburð. "Maður er ekki einn, þetta er magnað. Ég horfi á lífið öðrum augum í dag. Þetta er nýtt líf."

Og þetta er jólakveðjan frá Elíasi þetta árið: "Kaupa reykskynjara og hætta að vera heimsk."