Stofna samtök fyrir foreldra sem misst hafa barn með skyndilegum hætti

Það er gríðarlegt áfall að missa barn með skyndilegum hætti segir faðir sem þekkir sorgina. Hann kemur nú að stofnun samtaka fyrir foreldra í sömu sporum og segir mikilvægt að ræða málin enda sé það gott fyrir sálina.

Næsta föstudag verður haldinn stofnfundur samtaka foreldra sem hafa misst börn eða ungmenni með skyndilegum hætti. Einn þeirra sem kemur að stofnun samtakanna er Pétur Emilsson sem þekkir sorgina af eigin raun en hann missti Stefaníu átján ára dóttur sína í slysi árið 2003.

„Þá dó maður, í tvö ár, ég og konan," segir Pétur. „Þetta er gríðarlegt áfall. Það var stutt í að maður fann brestinn, að maður færi yfirum."

Pétur og Edda kona stofnuðu Kærleikssjóð Stefaníu Guðrúnar Pétursdóttur til minningar um dóttur sína. Þau segja mikilvægt fyrir þá sem missa barn að ræða það.

„Við eigum alltaf að vera opin með þetta og það hefur hálpað okkur mikið. Fólk er oft feimið. Ef þú vilt ekki tala um það þá vill fólk yfirleitt ekki tala um það. Það er gott fyrir sálina að tala um þetta. Gott fyrir andann. Þetta er allt í undirmeðvitundinni, þetta hverfur ekki."

Pétur segir mikil þörf á samtökum sem þessum og vonar að þau geti hjálpað mörgum. Stofnfundurinn verður í Grafarvogskirkju næsta föstudag klukkan fimm og hvetur hann fólk til að mæta.

„Við lifum á upplýsingaöld. Ef við flettum blöðum eða skoðum fréttir, þá eru ansi margir að tjá sig á ýmsum sviðum. En þetta hefur verið svolítið lokað," segir Pétur og bætir við: „Komiði nú."