Eldur laus í leikskóla í Langagerði

Töluverðar skemmdir urðu vegna eldsvoða í leikskóla í Langagerði í Reykjavík fyrr í dag.

Slökkvilið höfuðborgarsvæðisins fékk tilkynningu um eldinn um klukkan 13.30. Greiðlega gekk að slökkva eldinn eftir að reykkafarar voru sendir inn í skólann. Skólinn var mannlaus þegar eldurinn kom upp.

Talið er að eldsupptök hafi orðið vegna vatnsvélar sem brann yfir. Þrátt fyrir skemmdirnar af völdum eldsins má reikna með að skólastarf verði að stórum hluta eðlilegt á morgun.