Hugleiðing um starf sjúkraliða

Starf sjúkraliða er gefandi og skemmtilegt. Námið veitir aukið starfsöryggi og þokkaleg laun miðað við það launaumhverfi sem kvennastéttir á Íslandi búa við. Sjúkraliðar hafa getað stýrt starfshlutfalli sínu og á hvaða tíma starfið er unnið, allt eftir þörfum fjölskyldunnar. Starfsmöguleikar eru góðir, fjölbreytilegir og krefjandi. Starfskrafta sjúkraliða er óskað víða, enda eftirsóttir starfsmenn um land allt. Sjúkraliðanámið er góður undirbúningur undir lífið, uppeldi, samskipti við annað fólk og gerir einstaklinginn færan um að meta sjálfur þörf fjölskyldunnar á heilbrigðisþjónustu.

Sjúkraliðanámið er á heilbrigðis-, náttúru- og félagssviði og er einnig góður undirbúningur fyrir þá sem huga að lengra námi í háskóla.

Af hverju sjúkraliðabrú?

Á árunum í kringum tvítugt eða jafnvel fyrr kemur að því að flestir velja sér sitt ævistarf og fara þá sumir út á vinnumarkaðinn en aðrir fara í áframhaldandi nám. Það starf sem valið er, er líklegt til að standa undir þeim lífsgæðum sem hver og einn ætlar sér og er innan hans áhugasviðs. Ekki eru þó allir sem njóta þeirra forréttinda að geta stundað það nám og þá vinnu þar sem áhugasviðið er. Þó hafa þeir möguleikar aukist til muna nú á dögum með tilkomu fjarnáms.

Árið 1993 bauðst okkur, nokkrum konum á besta aldri sem unnu á sjúkrahúsi á Norðurlandi, að taka sjúkraliðanám í fjarnámi frá Fjölbrautaskóla Norðurlands vestra. Með fjarnáminu komu möguleikarnir til að ná sér í réttindi til sjúkraliðastarfsins en við höfðum unnið inni á stofnuninni sem ófaglærðar, möguleikar sem voru ekki fyrir hendi á yngri árum eða ekki nýttir. Það má segja að þetta hafi verið fyrsti vísirinn að sjúkraliðabrú. Með góðum stuðningi Fjölbrautaskólans, samstarfsfélaga og þeirrar stofnunar sem við unnum hjá útskrifuðust fjórir sjúkraliðar árið 1996. Það voru stoltar konur sem settu upp merki Sjúkraliðafélagsins á þessum tímamótum.

Árið 2000 var sjúkraliðabrúin lögfest í aðalnámskrá framhaldsskóla. Það nám stendur einstaklingum til boða sem hafa náð 23 ára aldri, hafa fimm ára starfsreynslu og meðmæli frá sínum vinnuveitanda. Auk þess þarf viðkomandi að hafa lokið starfstengdum námskeiðum á vegum stéttarfélaga, sveitarfélaga og/eða annarra aðila með það að markmiði að auka kunnáttu og færni til starfa á hjúkrunarsviði.

Ekki voru allir sammála um ágæti þessa náms, en miðað við mína reynslu er þetta frábært námstækifæri fyrir þá sem ekki höfðu tækifæri til náms á sínum yngri árum en vinna inni á heilbrigðissviði.

Ef ég væri í þeirri stöðu í dag að hafa starfað sem ófaglærð við aðhlynningu inni á heilbrigðisstofnunum myndi ég ekki hika við að nýta mér möguleika brúarnámsins eða setjast á skólabekk ef mögulegt væri. Sjúkraliðanámið er gott og fjölbreytt nám sem veitir góðan faglegan grunn og veitir þeim sem starfa við aðhlynningu/hjúkrun aukið sjálfstraust í starfinu.

Sjúkraliðastarfið gefur í allar áttir, er faglegt og traust starf sem við erum stolt af að sinna.