Tugir smábáta vilja á makríl

Landssambandi smábátaeigenda (LS) hafa borist yfir 70 tilkynningar frá útgerðarmönnum smábáta um að þeir stefni á makrílveiðar í sumar komanda. Í sumar sem leið stunduðu 17 bátar makrílveiðar með handfærum og veiddu samtals 1.100 tonn.

Aðalfundur Landssamband smábátaeigenda ályktaði í haust að makrílpottur fyrir smábáta yrði aukinn í 18% af heildarafla í makríl, eða yrði að lágmarki 20 þúsund tonn. Í kjölfarið var kallað eftir upplýsingum frá útgerðarmönnum um vilja til makrílveiða vegna viðræðna við atvinnuvega- og nýsköpunarráðuneytið um veiðarnar 2013.

Makrílveiðar á handfæri hafa verið stundaðar í nokkur ár. Þeir bátar sem stunduðu þessar veiðar á síðastliðnu fiskveiðiári gerðu það með góðum árangri.

LS álítur úthlutun aflaheimilda í makríl, eins og hún hefur verið, engan veginn fullnægja þeirri þörf sem er fyrir þennan bátaflokk. Helstu rök fyrir auknum veiðiheimildum til smábáta í makríl eru að mati LS að veiðarnar eru umhverfisvænar og skila hágæða hráefni. Þær eru einnig atvinnuskapandi og afla mikillar þekkingar um göngur makríls á grunnslóð. - shá