Eins manns rusl er annars gull

Dellusafnið á Flateyri sem opnað var á liðnu sumri hýsir forvitnileg einkasöfn sem fólk hefur lánað til sýningar og auðvelt er að gleyma sér við að skoða. Pjetur Sigurðsson ljósmyndari leit þar inn og heillaðist.

"Öll viðbrögð við þessu safni hafa verið mjög jákvæð. Gestur sem kom í gær lýsti til dæmis yfir ánægju með að alltaf væri eitthvað nýtt og öðruvísi handan við hornið, enda er hér um mörg einkasöfn að ræða," segir Jón Svanberg Hjartarson, hugmyndasmiður Dellusafnsins á Flateyri.

Hann er framkvæmdastjóri Iceland ProFishing sem gerir út sjóstangveiðibáta á Flateyri og Suðureyri. Einnig er hann nýráðinn framkvæmdastjóri Slysavarnafélagsins Landsbjargar.

Hann segir misjafnt hverju gestir heillist mest af á safninu. "Lítill gutti var hrifnastur af teskeiðunum þrátt fyrir að vinnuvélamódelin væru skammt frá. Svo komu síðhærðir og skeggjaðir mótorhjólamenn í rifnum vestum. Þá var ég með í láni gamalt Harley Davidson mótorhjól og taldi víst að þeir myndu falla flatir fyrir því en þeir stóðu þá slefandi yfir sykurmolunum. Svona er þetta óútreiknanlegt."

Mikil ástríða liggur að baki hverju safni. "Safnarar þurfa að vera vel vakandi og geta sannfært eigandann um að hlutur sé betur kominn annars staðar en hjá honum," bendir Jón Svanberg á. "En stundum er rusl í augum eins gull í augum annars."

Jón Svanberg var um árabil lögreglumaður fyrir vestan. Þá kveðst hann hafa fengið þá flugu í höfuðið að safna merkjum, húfum og öllu mögulegu sem tengdist starfinu. Nú er lögguminjasafnið undirstaða Dellusafnsins. "Ég fann margt á netinu og skipti við kollega úti um allan heim," lýsir hann og bætir við hlæjandi að stundum hafi hann þurft að beita útsjónarsemi eins og öll söfnun krefjist.

"Vinnufélagar mínir á Ísafirði kvörtuðu undan því að þeir mættu ekki fara úr jökkunum í kaffitímanum, þá væri ég búinn að spretta af þeim merkjunum!"